Coa pandeireta na ma é un espectáculo pensado para achegar aos máis pequenos e pequenas á riqueza da música tradicional galega e á importancia da tradición oral en galego. Con este proxecto, María Faltri quere render homenaxe ás cantareiras e á cultura popular galega, transmitindo a súa esencia de xeito lúdico e participativo.
María Faltri (voz, pandeireta e guitarra) acompañada por Berto Rodríguez (guitarra e acordeón) guiará aos asistentes nunha viaxe pola música galega, ofrecendo un repertorio de cancións emblemáticas da música tradicional. A través de xogos de repetición, bailes e brincadeiras, as nenas e nenos terán a oportunidade de recoñecer parte da historia popular e tradicional da nosa música, facendo súa a importancia da tradición oral.